Dom biskopa Bena
W něhdyšim ryćerkuble je dźensa kubłanske a konferencne zarjadnišćo biskopstwa Drježdźany-Mišnjo zaměstnjene.
Njedaloko wot Budyšina steji, direktnje při Wysokej hasy (Via Regia), Dom biskopa Bena. W něhdyšim ryćerkuble je dźensa kubłanske a konferencne zarjadnišćo biskopstwa Drježdźany-Mišnjo zaměstnjene. Tute nosy mjeno biskopa Bena, kotryž skutkowaše w 11. lětstotku jako biskop Mišnja. Dokelž měješe přewažny podźěl na pokřesćanšćenju Serbow, jeho tež „Japoštoła Serbow“ mjenuja. Prjedy hač biskopstwo Mišnjo na spočatku 20. lětstotka dom kupi, měješe kubło w běhu lětstotkow wjacorych wobsedźerjow. Hač do kónca 2. swětoweje wójny słužeše ležownosć katolskej cyrkwi jako měšniski seminar. Wot dospołneje rekonstrukcije kubła w lěće 1992 sem njeje Dom biskopa Bena jenož kubłanišćo, ale tež prózdninski domicil a zdobom městnosć najwšelakorišich zarjadowanjow. Kóždolětnje w lěću wotměwa so tu Hudźbny swjedźeń Smochćicy, kotryž přiwabi sta wopytowarjow do něhdyšeho ryćerkubła. Mehr
